Сочида яңа туган бала 3 көннән соң үлгән. Ата-анасы аны хастаханәгә алып барудан баш тарткан булган. Бу турыда «Комсомольская правда» хәбәр итте.
Якынча белешмә буенча, сабый 8 мартта вакытыннан күпкә алдарак – йөклелекнең 28 атнасында туа. 39 яшьлек әни кеше сабыйны өйдә тудыра, аны әтисе каршы ала.
Аннары әти кеше «ашыгыч ярдәм» чакырырга була, ул бала тапкан хатынын каратырга тели. Табиблар хастаханәгә барырга кирәк булуын әйтә, тик ата белән ана хастаханәгә ятудан баш тарту турында имза куя.
Мондый очракта ана белән баланың иминлеге өчен табиб бердәнбер чишелеш таба – ул полиция чакыра. Ләкин әти белән әни кешене җитлекми туган баланы хастаханәгә алып барырга кирәк икәненә хокук саклаучылар да күндерә алмый.
Ата-анасы сүзләренчә, 2 тәүлек баланы хәле яхшы була. Өченче көнне иртән сабый караватта сулыш алмыйча ята. Аны ата белән ана реанимацияләп карый, тик булдыра алмый.
Хәзер гаиләне тикшерүчеләр, балигъ булмаган балалар эшләре буенча инспекторлар тикшерә. Баланың мәетендә көч кулланып үтерү билгеләре табылмаган, диелә хәбәрдә.