«Нинди сүзләр белән юатыйм икән?» – Закир Шаһбанның туганы махсус операциядә һәлак

Татарстанның атказанган артисты, музыкант Закир Шаһбанның якын туганы махсус операциядә һәлак булган.

«Закирның туганнан туган Мәрьям апасының улы Әсхәт ил алдындагы хәрби бурычын үтәгәндә батырларча һәлак булды. Аллаһы Тәгалә, улларын, ирләрен, энекәш һәм абыйларын югалтканнарга сабырлык бирсен. Якыннарын югалтканнарны юатырлык сүзләр табу бик авыр. Закир да: «Нинди генә сүзләр белән юатыйм икән?» – дип бик борчылды. Юк андый сүзләр…

Газизләрен югалтканнарга Раббым сабырлык бирсен. Ил өстенә килгән афәт. Ахырлары хәерле булып тәмамлансын. Батырларның урыннарын җәннәтле ит, Раббым! Һәр шәһәргә, районга, һәр авылга кагыла кайгы җиле. Я Аллаһым, илләребезнең иминлеген кайтар», – дип язды бу хакта «Телеграм» каналында Закир Шаһбанның тормыш иптәше, шагыйрә Гөлүсә Шаһбан.

Ил өчен көрәштә бергә булган дус егетләре Әсхәткә багышлап җыр иҗат иткәннәр.