Америкада бер пар үзенчәлекле туй уздырган. Өйләнешергә уйлаган һәм бәби көткән пар – Сара һәм Брэндон Перри – туй көнен әйбәт планлаштырдык, дип уйлый, алар исәбе буенча, бәби туйга кадәр тумаска тиеш була әле. Бу хакта 120.su сайты яза.
Әмма кәләшнең тулгаклары вакытыннан алда башлана, шулай итеп, кияү белән кәләш хастаханәгә ашыгып кына калмыйча, язылышу тантанасын бала табу палатасында ук уздырырга уйлый. Шәфкать туташлары булачак әнине ак җәймә белән чорный, ак тукыма кисәгеннән фата да ясый. Хастаханәдә хәтта рухани да табыла, ул Сара белән Брэндонны никахлаштыра. Дөрес, рухани хастаханәдә бөтенләй башка сәбәп белән була, шуңа күрә тантананы да гадәти киемнәрдән генә уздыра.
Әмма, кияү белән кәләш мондый үзенчәлекле туйларыннан бик канәгать кала, алар бу көнне идеаль дип атый. Ә озак та узмый, яшь пар туйларына иң зур бүләк ала – аларның уллары туа. Аңа Оливер дип исем кушканнар.