Юмор остасы Данир Сабировның концерт директоры, хатыны Миләүшә үз концертын куярга җыенуы турында социаль челтәрдәге сәхифәсендә хәбәр итеп, халыкны шаккатырды.
1 апрель – Көлке көне алдыннан чыккан хәбәргә ышанмаучылар да бар, сентябрь азагында булачак концертка барырга җыенучылар да шактый.
Афишага караганда, концерт 27 сентябрьдә УНИКС концертлар залында булачак. Махсус кунак – Данир Сабиров. Тамаша «Җырчы блогер түгел» дип атала.
«Мин моңа озак килдем… Студиядә йокысыз төннәр, репетициядә аякка чыккан сөялләр – болар барысы да минем сәхнәгә чыгу юлым. Һәрберегезне күрергә шат булачакмын! Концертта минем беренче җырларымны, Сергей белән эшләү нәтиҗәсен күрәчәксез. Бию – минем өчен яңа әйбер. «Җырчы түгел блогер», монда өтер кирәк, сез аны концерттан соң куячаксыз. Очрашуга кадәр тамашачым», – дип язган артист хатыны.
