Данир Сабиров кабат депрессиядә: «Кемгәдер мин артист, талант, ә кемгәдер – дивана»

Юмор остасы Данир Сабиров кабат төшенкелеккә бирелгән. Артист белән мондый хәл 2017 елда булган иде. Ул бу хакта социаль челтәрдәге сәхифәсендә сөйләде.

«Идәнгә ятып, идәнгә сугып елап яткан чакларым. Ашау түгел, хәтта дару да керми миңа. Дару кабам, шундук кире косып чыгарам. Яшәүне бер яме юк. Яшисе килми! Үземә кул салу теләге көчле иде», – дип язган иде артист.

Данир Сабиров шушы халәтенә багышлап шактый озын шигырь язган, сүгенеп тә алган шунда. «Дөнья ямьле...» дип исемләнгән шигырь артистның төшенкелеккә бирелгәнен тасвирлаган. Комментарийларда «тагын башландымени» дип борчылганнар да, шулай ук «берәр кыз яки малай алып кайтырга кирәк» кебек киңәшләр дә биргәннәр.

«Дөнья ямьле…

Дөнья ямьле, тик әлегә

Таба алмыйм ямьлелекне.

Үзем кеше күңелен күрәм...

Тик ник буш үземнеке?

Үзем болай шаян кеше,

Күпләр күргәч көләләр,

Әнә теге кызык малай, дип

Төртеп тә күрсәтәләр.

Кызыклыгын кызыктыр да,

Ә күңлемдә – сүлпәнлек.

Нәрсә җитми – үзем белмим.

Хәл әлегә түзәрлек.

Аңлыйм, сугыш кырларында

Кемдер тилмереп ята.

Мохтаҗлар һәм гарипләр дә,

Яшим, диеп тырыша.

Аларга да мөмкин кадәр

Булыштыргалаштырам.

Сезне дә үземчә шуңа

Чакырырга тырышам.

Аңлыйм, хәзер кемгәдер

Күпкә миннән кыенрак.

Тик шуны аңласам да,

Җайланмый, яффаемайт!

Әлегә ямьлелекнең

Ывключатиле сүнгән.

Кеше көлдереп, үзем

Әлегә йөрим сүлпән.

Алай да начар уйларга

Теләмим бирешергә.

Үзем белән үзем шулай

Көрәшәм мин әлегә.

Кемгәдер мин артист, талант,

Ә кемгәдер – дивана.

Дөнья шулай яратылган,

Ярап булмый барсына.

Әллә ниләр уйлап ятам –

Менә шундадыр хатам.

Хатамны аңлыйм да кебек,

Тик тагын кабатланам.

Кәефсезлелекнең ямен

Кирәк микән табарга?

Һәм шушы билгесезлекне

Аңлый алмыйм покага.

Белмим, сезнең арада

Бардыр мине аңлаучы?

Аңлаучылар барын бар да,

Тик кирәк дәвалаучы.

Һәм шушы дәвалаучыны

Мин эзлимен күптәннән.

Эзләсәм дә, дәвалаучы

Үзем икәнен беләм.

Диагнозын да беләм лә,

Вырачын да мин беләм.

Тик барыбер әлегә

Шуның белән интегәм.

Тутырып, сүгенеп әйтсәк,

Шуның белән с е ….!

Яз җиткәнен дә күрәм лә,

Кош сайравын ишетәм.

Шуңа сөенеп яшәргә

Кирәк икәнен беләм.

Дөнья ямьле, тик әлегә

Таба алмыйм ямьлелекне.

Үзем кеше күңелен күрәм,

Тик ник буш үземнеке?..»