1 апрельдән Россиядә социаль пенсияләр 14,75 процентка индексацияләнә. Аларның уртача күләме 15,5 мең булачак. Бу хакта «РИА Новости»га РАНХиГС белгече Марина Солодовникова сөйләгән.
«Россия законнары буенча, 1 апрельдән традицион рәвештә социаль пенсияләр индексацияләнә (14,75 процентка – «РИА Новости» искәрмәсе). 2025 елның 1 апреленнән Россиядә социаль пенсияләрнең уртача күләме 15 505 сум булачак, бу – 2025 елда пенсионерның федераль дәрәҗәдә билгеләнгән яшәү минимумына (15 250 сум) тәңгәл була диярлек», – дигән Солодовникова.
Аның сүзләренчә, мондый пенсияне башка пенсия алу хокукы (иминият пенсиясе, тиешле еллар эшләгән өчен пенсия һ.б.) булмаган кешеләр алырга мөмкин. Бу очракта пенсия гомум билгеләнгән сроктан 5 ел соңрак – 65 (хатын-кызлар) һәм 70 (ир-атлар) яшьтә билгеләнә. Социаль пенсияләрне шулай ук инвалидлык яки туендыручыны югалту очраклары буенча алалар.
«Индексация 166 нчы федераль закон буенча пенсия алучыларга да кагылачак. Болар: Бөек Ватан сугышы ветераннары, блокада Ленинградында һәм камалыштагы шәһәрләрдә яшәүчеләр, радиация һәм башка техноген бәла-казалардан зыян күрүчеләр һәм башкалар. Мондый пенсия алучыларның гомуми саны – якынча 700 мең кеше», – дип өстәгән белгеч.