Минзәлә театрына “Татар-информ” фотосыннан Иблис торты пешереп бүләк иттеләр

5 Декабря 2017

Укылган: 640 тапкыр

Автор: Рузилә МӨХӘММӘТОВА
Фото: Михаил Захаров
“Тортны якташым, мине премьера белән котлап, әнием аша биреп җибәргән. Торт әле дә суыткычымда тора. Без аны бөтен коллектив җыелгач ашарбыз дип торам”, - диде Рөстәм Зиннуров “Татар-информ” хәбәрчесенә.

Сабир Өметбаев исемендәге Минзәлә татар дәүләт драма театрының “Иблис” премьерасыннан соң Иблис ролен уйнаган Рөстәм Зиннуровның иҗатына гашыйк райондашы театр коллективына кило ярымлы торт ясап җибәргән.

 

Әлеге торт фоторәсемен театрның яшь артисты Рөстәм Зиннуров үзенең социаль челтәрдәге битенә урнаштырган. Дүрт почмаклы тортның почмакларына җиләкләр, ә җиләкләр арасында кара миләштән “иблис күзләре” куелган иде. Торт “Татар-информ” фотохәбәрчесе Михаил Захаровның спектакльне премьера алдыннан күрсәткән вакытта бөтен катнашучылар һәм кунаклар белән сәхнәдә ясалган фоторәсеме белән бизәлгән. Фоторәсемдә артистлар һәм кунаклар арасында “Татар-информ” хәбәрчесе дә бар. Әлегә тортның тәмлелеге турында мәгълүмат юк, “Татар-информ” хәбәрчесен кем ашаячагы билгеле түгел.

 

“Тортны якташым, мине премьера белән котлап, әнием аша биреп җибәргән. Торт әле дә суыткычымда тора. Без аны дүшәмбе көн бөтен коллектив җыелгач ашарбыз дип торам”, - диде Рөстәм Зиннуров “Татар-информ” хәбәрчесенә. 

Ә тортның авторы башкалар өчен билгесез булып калырга теләде, Иблис тортының составын да, рецептын да ачмады. "Тортны Рөстәм Зиннуровны һәм аның әнисен якын итеп ясадым", - диде ул.

 

Театрның баш рәссамы Валерий Яшкулов: “Мондый могҗизаи тортны ашап булырмы икән, - дип гаҗәпләнә. – Әмма торт булгач, ашарга туры килә. Алайса әрәм була бит ул. Коллективтагылар һәрберсе мондагы персонажларны үзләре кисеп ашарлармы икән? Миннән башлагыз!” – ди ул. Спекаткльнең режиссеры Сергей Потапов Карен Шахназаровның 1988 елда төшерелгән "Город Зеро" абсурд фильмын искә төшерә. Анда Леонид Филатов уйнаган төп герой Варакинның башы рәвешендәге торт пешерелгән була. 

 

Мәгълүмат өчен. Минзәлә театрында азәрбәйҗан классик әсәре буенча “Иблис” трагедиясен танылган режиссер Сергей Потапов куйды. Саха милләтеннән булган Сергей Потаповны театрга Валерий Яшкулов алып килде.

Спектакльдә Иблис ролен яшь артист Рөстәм Зиннуров башкара. Рөстәм тумышы белән Кукмара районыннан. Кукмара районы мәдәният йортында урнашкан халык театрында уйнап, ул уйнаган елны коллективның гран-при алганлыгы билгеле. Иблис образы – яшь актерның беренче зур роле. Премьера алдыннан спектакльне күрсәткәндә ул кашларын һәм чәчен кырып Иблис образына якынайган иде. Ә инде премьерага кашларын агартып карарга булган.

24 ноябрь көнне “Иблис” спектакленең премьерасы булды. Минзәлә театры җитәкчелеге билетлар бик тиз сатылып беткәнлеген, спектакльнең зур аншлаг белән узуын әйтә. 


Фикерләр








Мәдәният

“Яңа татар пьесасы”: татар драматургиясендә бөек депрессия яки Гүзәл Сәгыйтованың зәңгәр бабае

Камал театрының Кече залында өч көн дәвамында “Яңа татар пьесасы” конкурсы кысаларында I Яшь татар драматурглары лабораториясендә катнашып драматургия жанрында текстлар язган иҗатчыларның әсәрләре укылды.

Мәдәният

Альбина Шаһиморатова: Булдырам дип яшәргә кирәк!

Дөньякүләм опера премьераларын күзәтсәң, аларда Россиянең алтын тавышлары катнашуын күрәбез. Шулар арасында милләттәшебез Альбина Шаһиморатованың да булуы аеруча зур горурлык хисләре уята. Ла-Скала (Италия), Ковент-Гарден (Англия), Метрополитен-опера (Америка), Вена (Австрия), Токио (Япония), Мюнхен (Германия) һ.б. дәрәҗәле опера сәхнәләрендә көчле алкышларга күмелгән сопрано тавышлы Альбина өчен Татарстан халкы гына түгел, Россия сәнгать сөючеләре куана. 

БАШКА ЯҢАЛЫКЛАР

Intertat.ru © 2001 - 2017 Әлеге ресурста 12+, 16+, 18+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@intertat.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла