Арча кешесен үгез таптап һәм сөзеп үтергән

Арча районындагы Михайловка авылында яшәүче ир-атны үгез таптап үтергәнен Россия Тикшерү комитетының Татарстан буенча идарәсе матбугат хезмәте хәбәр итте.

55 яшьлек ир күршеләренә сыерларын көтүгә алып чыгарга ярдәм итәргә килгән. Башта алар үгезне лапаска бикләп куярга җыенган.

Ләкин үгез аны егып салган, таптый башлаган. шуннан соң үгез ирне мөгезе белән күтәреп алып, коймага ыргыткан.

Ир-ат җимерелгән койма аша чыгып өлгергән. Аңа ярдәмгә көтү хуҗасы килгән. Ул үгезне тынычландырган, табиблар чакырган.

Ләкин күрше ир табиблар килгәнче үлгән.