Бала тудырганда окситоцин куллану зарарлымы?

16 Апреля 2018

Укылган: 496 тапкыр

Автор: Динә ШӘМСЕТДИНОВА
Бала тудыру йортларында, тулгакны көчәйтү өчен, окситоцин дигән гормон кулланалар. Аны балага зыян сала диюләре дөресме?
Татарстан сәламәтлек саклау министрлыгы белгече, югары категорияле акушер-гинеколог Наилә Гайнанова әйтүенчә, бала тудыру эшчәнлеген стимуляцияләү-тизләтү өчен кулланган гормон – окситоцинның хатын-кызга һәм балага бернинди зыяны юк.

Табибларның эш барышы дәвалау стандартлары, беркетмәләрендә теркәлгән. Алар шул документ нигезендә эшли. Физиологик яктан нормаль саналган бала тудыру эшчәнлеген стимуляцияләү таләп ителми. Хатын-кыз бала тудыра алмыйча, интегеп озак көчәнгән очракта, бу процессны көчәйтеп, тизләтеп җибәрү өчен, “окситоцин” гормоны кулланабыз, диде ул.

Табиб фикеренчә, окситоцин хатын-кыз кичерә торган авырту интенсивлыгына тәэсир итә алмый. Кирәк чакта бала тудыру эшчәнлеге барышына хас булган авыртуны җиңеләйтү өчен табиблар эпидураль анестезия куллана. Белгеч җитди эзләнүләрнең берсендә дә гормонның тискәре йогынытысы турында искәртелмәгән булуын әйтә.

Окситоцин куллану – табиб кулланган коралларның бер өлеше генә. Норматив документларда, законда табибның барлык хәрәкәтләре чагылган. Һәркемнең эшчәнлеге шул закон нигезендә корыла. Татарстанда кулланган ысуллар халыкара стандартлар кысаларында эшләнгән.

Кесәл булып арыган хатын таза-сау бала тудыра алмый. Хәзер үк кесарево операциясенә дә кертәсе килми. Акушерлык һәм гинекология кулланмасы нигезендә, һәрнәрсә үз вакытында эшләнә. Кирәк тапкан очракта гына окситоцин кулланалар. Авырлының суы китеп, хатын-кыз көне буе авыртып бала таба алмаган очракта да окситоцинны “тоташтырырга” ашыкмыйлар. Акушерлар аналык әзер булуын көтеп торырга тиеш.

Табиб окстоцин куллануның мәгънәсез булган очракларын да искәртте.

Гадәттә, хатын-кызның суы киткәч, баш миенә “бала чыгарга әзер” хәбәре китә. Канга простагландин гормоннары ташлана, бу күренеш, үз чиратында, аналыкка йогынты ясый – аны йомшартырга, аңа кыскарырга ярдәм итә. Бу катлаулы процесс берникадәр вакыт узуын таләп итә. Бала тудыру аралыгы кыска булганда, аналыкның әзер булмавы аңлашыла. Андый вакытта стимуляциянең мәгънәсе юк. Окситоцин булышмаган яисә кулланырга ярамаган очраклар да бар икән.

Бала тудыру эшчәнлеге озакка китеп аналыгы хәлсезләнгәч, бу гормонның файдасы юк. Плацента аерыла башлаганда яисә бала авыр хәлдә булган вакытта да окситоцин гормонын кулланырга ярамый. Гормонны кулланырга ярамаган тагын бер очрак бар. Беренче бала кесарево ярдәмендә туганнан соң аналыкта эз кала, шуңа икенче тапкыр бала тапканда окситоцинны куллану тыелган, – дип сөйләде табиб.

Табиб окситоцинны куллану балага бернинди зыян салмавын әйтте. “Гормонның бала сәламәтлеге өчен бернинди зарары юк, – диде ул.

Профессор, яңа туган балалар белән эш иткән неонатолог Валерий Сафронов та бу фикер белән килешә, окситоцин гормонының балага берничек тәэсир итмәвен таный.

Фикерләр








Сорау-җавап

Казанда фатирларга җылы бирүне ни өчен туктатмыйлар?

Бу көннәрдә һава температурасы сизелерлек күтәрелү сәбәпле, Казан башкарма комитетына гражданнар йортларга җылы бирүне сүндерүне сорап мөрәҗәгать итә башлаган. 

Сорау-җавап

Яран гөлне дөрес итеп ничек күчереп утыртырга?

Яз җитү белән, хуҗабикәләр өйдәге гөлләрне күчереп утырта башлый. Бу гөлләр өчен кыштан соң табигый уяну кебек. Татар халкы бик яратып үрчетә торган яран гөлен күчереп утырту өчен дә яз - иң кулай вакыт.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Персонал данные

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла